Бөлшек салығын төмендету – бизнес пен мемлекет арасындағы баланс
Алматы облысы Кәсіпкерлер палатасының сауда және қызмет көрсету саласы бойынша салалық кеңесінің отырысында бөлшек сауда салығының мөлшерлемесін 4%-дан 2%-ға дейін төмендету туралы маңызды мәселе талқыланды. Жиынға Алматы облысы Кәсіпкерлер палатасының құқықтық мәселелері жөніндегі директорының орынбасары Еркін Майлыбайұлы, сауда және қызмет көрсету саласы бойынша кәсіпкерлердің салалық кеңесінің төрағасы Асет Талғатбек, Мемлекеттік кірістер департаменті басшысының орынбасары Алмат Калиев, экономика және бюджеттік жоспарлау басқармасы басшысының орынбасары Бакытгүл Төлебекова және осы саланың бас маманы Алма Каракучукова, «Sevan» жеке кәсіпкерлігінің жетекшісі Армен Борян, аймақтық кеңестің өкілі Леонид Лян, Алматы облысы Кәсіпкерлер палатасының салалық даму бөлімінің басшысы Константинова Елена қатысты.
Отырыста қатысушылар салық жүктемесінің төмендеуі аймақтағы бизнес дамуына және көлеңкелі экономикадан шығуға серпін беретінін атап өтті. Мөлшерлемені 4%-дан 2%-ға дейін төмендету кәсіпкерлерге пайдасын арттыруға, өндірісті дамытуға және жаңартуға, сондай-ақ жаңа жұмыс орындарын құруға мүмкіндік береді. Бұл салық ауыртпалығын сезінетін шағын дүкендер, сауда нүктелері және бөлшек сауданың басқа да өкілдері үшін өте маңызды.
Елена Константинованың айтуынша, тікелей экономикалық әсерден басқа, бөлшек сауда салығының төмендеуі тұтыну нарығына оң әсерін тигізеді. Сатушыларға салық жүктемесінің төмендеуінен туындаған тауар бағаларының төмендеуі халықтың сатып алу қабілетін арттырып, ішкі тұтынудың өсуіне ықпал етеді деп күтілуде, - деді.
«Салықтың төмендеуі бөлшек сауда салығының мөлшерлемесі жоғары болып қала беретін басқа аймақтардың өкілдерімен салыстырғанда біздің кәсіпкерлердің бәсекеге қабілеттілігін арттырады. Бұл облысқа жаңа инвестициялар мен бизнес тартуы мүмкін», - дейді салалық кеңестің төрағасы Асет Талғатбек.
Талқылау барысында осы шешімнің іске асырылуына байланысты мәселелер де көтерілді. Қатысушылар жаңа салық мөлшерлемелерін қолдануда ашықтық пен оперативтіліктің қажеттілігін, сондай-ақ барлық өзгерістер мен рәсімдерді толық түсіну үшін кәсіпкерлерге ақпараттық қолдаудың маңыздылығын атап өтті.
Жалпы алғанда, бөлшек сауда салығын 4%-дан 2%-ға дейін төмендету Алматы облысының инвестициялық климатын жақсартуға және экономикалық өсімді ынталандыруға бағытталған маңызды қадам ретінде қарастырылады. Қатысушылардың ойынша, бұл шешім бизнес дамуына қолайлы жағдайлар жасауға және халықтың әл-ауқатын арттыруға ықпал етеді.
Дегенмен, бөлшек сауда салығының мөлшерлемесін төмендетудің оң және теріс жақтары да бар, мысалы, облыстық бюджетке түсетін түсімдердің қысқаруы сөзсіз. Бұл әлеуметтік бағдарламалар мен инфрақұрылымдық жобаларды қаржыландыру мүмкіндіктерін шектейді. Тауар бағаларының төмендеуі күтілсе де, кәсіпкерлердің бір бөлігі бағаны төмендетудің орнына пайдасын арттырып, салықты төмендетудің артықшылығын тұтынушыларға бермеу қаупі бар.
Дегенмен, директордың құқықтық мәселелер жөніндегі орынбасары Еркін Майлыбайұлы бюджетке түсетін түсімдерді басқа көздер арқылы, мысалы, салықтық әкімшілендірудің тиімділігін арттыру, сондай-ақ әкімшілік айыппұлдарды өндіру және әкімшілік шығыстарды азайту арқылы арттыруға болатынын да айтты.
Бөлшек сауда салығының мөлшерлемесін төмендету туралы шешім қабылдау үшін жағдайды кешенді талдау қажет. Жаңа салық мөлшерлемелерін қолдануда ашықтық пен бақылауды қамтамасыз ету, сондай-ақ, осы шешімнен зардап шегуі мүмкін экономика салаларын қолдау механизмдерін әзірлеу маңызды. Кәсіпкерлер палатасы бұл мәселені жан-жақты қарастырып, кәсіпкерлер мен мемлекет арасындағы балансты орнату үшін қосымша іс-шаралар өткізуді жоспарлап отыр.
Пікір қалдыру:
Пікірлер: